حوار مع النفس  

مرسلة بواسطة Abd-Alrahman

وسالت نفسي حائرا ؟؟
انا من اكون ؟
انا من اكون ؟
مالي عشقت السير في طرق الظنون ؟
فإذ جنوني صار بعض تعقلي
واذا بافكاري يغلفها الحلول
انا من اكون ؟
انا من اكون ؟
ما بال بعض الناس صاروا ابحرا يخفون تحت الحب حقد الحاقدين ؟؟
يتقابلون باذرع مفتوحته والكره فيهم قد اطل من العيون
ياليت بين يدي مراه تري ما في قلوب الناس من امر دفين
انا .......... انا ........ انا
انا من اكون ؟؟
بيني وبين سعادتي بحر عميق
والناس حالوا بين قلبي والطريق
فلكم اعالجهم وبي سقم الضنا ولكم انجيهم وكنت انا الغريق
يارب ان ضاقت قلوب الناس عن مافي من خير فعفوك لا يضيق
يارب ان ضاقت قلوب الناس عن مافي من خير فعفوك لا يضيق
انا .......... انا ........ انا
انا من اكون ؟؟

80 What Abdot You ?

عيد فطر سعيد  

مرسلة بواسطة Abd-Alrahman


السلام عليكم ورحمة الله وبركاته
تحية طيبة وبعد
ازيكم يا كل المدونين
كل سنة وانتوا طيبين بمناسب عيد الفطر اعاده الله عليكم وعلينا بالخير واليمن والبركات
سبحان الله كنا من كام يوم بنقول رمضان جاي وسبحان الله في لحظات عدي ودلوقتي بنقول العيد جاي
اتمني لكل المدونين عيد سعيد ووقت ممتع ويارب تعود الايام ع الامة الاسلامية كلها بخير
وكانت اظرف الرسايل الي جاتلي ع الموبايل امبارح عشان تهنيني بالعيد
رسالة بتقول
قررت امانة الحزب الوطني تغيير (عيد مبارك )الي ( يا جمال العيد) نظرا للتغييرات الرئاسية القادمة
ضحكت عليها كتير الصراحة
والي ضحكتني اكتر بقي
رسالة تانية بتقول
عيد مبارك ونظيف وشريف
وكله سرور وكمال وجمال
مع تحيات الحزب الوطني
اسيبكوا بقي تستمتواع بوقتكوا
عســــــــــــــــــــــاكم من عــــــــــــــــواده

44 What Abdot You ?

وحان وقت الرحيــــــــــــــل  

مرسلة بواسطة Abd-Alrahman

وحان وقت الرحيل
تمر الايام والسنين في وقتها يكون شعورنا بها انا لن تمر ونشعر بطولها وصعوبتها ومرارتها
ولكنها في شريط الذكرايات تمر سريعة جدا جدا
ها انا الان في نفس المكان الذي كنت اقف فيه العام الماضي
ونفس البداية الي بدات بها وكان شيئا لم يكن
وكأن الوقت الطويل الذي مضي بكل صعوبة ومرارة
وتعب مضي في لمحة بصر
وهنا ادركت ان قطار الحياة يمر سريعا وان العمر لا ندركه الا بعد فواته
وعندها سمعت قول الله تعالي
بسم الله الرحمن الرحيم
(قال كم لبثتم في الارض عدد سنين * قالوا لبثنا يوما او بعض يوم فا اسال العادين)
صدق الله العظيم
وعلي الرغم من ذالك الا اننا لا نعي ما يحدث من حولنا في معظم الاوقات
ودائما يكون في مخيلتنا او في مخيلتي شخصيا
ان العمر ما زال طويلا وان الحياة مازات تفتح احضانها لي
ولكن بعد هذه التجربة
وهذه البداية تغير ما في مخيلتي تمام وادركت الواقع وعلمت اني بعد فوات العمر كله
سيمر علي شريط ذكراياتي سريعا كانه يوم او يومين

وها انا الان استعد اخوض التجربة ذاتها التي خضتها من قبل ولكن بائت بالفشل
متمنيا من الله تعالي ان يسدد خطاي في هذه المرة وان يوفقني وان يؤتيني خير هذا العام
ويكفيني شره انا وجميع المسلمين
ربنا اجعل عملنا مخلصا لوجهك الكريم وسلمه من الرياء والنفاق
واجعل كل اعمالنا فيما يرضيك وابعدنا عن سؤ الاعمال والاخلاق
امين يارب العالمين

تواجدي في لفترة القادمة سيكون قليل بسبب سفري الي اسيوط
اتمني من كل الزوار الدعاء لي بالتوفيق وانشاء الله مش هتاخر زي عادتي

تحياتي

41 What Abdot You ?

ضحــــكاية  

مرسلة بواسطة Abd-Alrahman

بعد دراسة جدوي دامت طول شهور عام 2008 طلعنا بنتايج
طبعا النتايج دي مش انا الي قولتها هيا جت لي في ايميل بس عجبتني اوي
قولت اضحككم معايا
خلينا مع النتايج
كيف تعرف أنك في عام 2008 ؟
واحد = تكتشف أن لديك خمسة عشر رقمًا هاتفيًا تخص أسرتك التي لا تزيد على ثلاثة أشخاص

اتنين = ترسل بريدًا الكترونيًا لزميلك في العمل الذي يجلس على مكتب مجاور لك.

تلاته = تتدهور علاقاتك بأفراد أسرتك أو أصدقائك ممن ليس لديهم بريد الكتروني.


اربعة = تقف بالسيارة تحت البيت ثم تتصل بالبيت بالموبايل لتطلب من يساعدك في حمل البقالة.

خمسة = كل إعلان في التلفزيون ينشر موقع إنترنت في أسفل الشاشة.

ستة = مغادرة البيت من دون أن تأخذ معك الموبايل – الذي لم تكن تستعمله طيلة عشرين أو ثلاثين عامًا من حياتك
تسبب لك الذعر فتعود لتأخذه
.
تمانية = تصحو في الصباح فتفتح الإنترنت قبل أن تشرب القهوة
.
تسعة = أنت الآن تقرأ هذا الكلام فتهز رأسك وتبتسم.

عشره = أنت مشغول جدًا لدرجة أنك لم تلحظ أن القائمة بلا رقم 7 .


احداشر = لقد حركت السطور لتتأكد من أنه لا يوجد رقم (7) فعلاً.

اتناشر = انا متأكد انك لو رجعت مرة أخري ستجد أن الرقم 7 موجود و انك لم تلحظه جيدا.

ثلاتشر -لقد حركت السطور مرة أخرى لتتأكد و مع ذلك لم تجد الرقم 7 طبعا أنا ضحكت عليك و هذا دليل على عدم ثقتك بنفسك و أنك تصدق أي كلام يقال لك

الآن أنت تضحك .. وترغب في إرسال هذه الرسالة إلى آخرين !

210 What Abdot You ?

هلت البشاير  

مرسلة بواسطة Abd-Alrahman



بعد طول غياب رجعت لكم تاني يا مدونين

وارجو ان محدش يكون زعلان مني

كنت برتب شوية حاجات كدة مع نفسي

عشان كدة اتاخرت عليكوا ودلوقتي رجعت

عشان اقول لكم

كل سنة وكل الامة الاسلامية بخير وسعادة

ويارب دايما الايام تمر ونحن في سعادة وسلام

اتمني من كل قلبي للامة الاسلامية ان تعيش بخير وسعادة وسلام

وكل الي زعلان ربنا يفرحه وكل الي عنده حرب ربنا يسلمة

ويحميه من كل شر

ويارب اشفي كل مريض

وحرر كل محتل

امين امين يارب العالمين
تحياتي لكم وكل عام وانتم بخير

وكان من اظرف الرسايل الي جتلي رسالة بتقول

غدا اول ايام رمضان وتم اعلان ذلك في الصعيد

حيث شوهد الهلال علي سيارةاسعاف

ههههههههه بصراحة ضحكت كتير عليها
تحياتي لكم جميعا

عبدالرحمن

49 What Abdot You ?

الفـــــــــــــــراق  

مرسلة بواسطة Abd-Alrahman

عيون باكية وخد مغمور بالدموع ويد باردة وقلب يكاد يتمزق من الحزن والخوف والشعور بالفراق
هكذا كان حالي عندما كنت اقف امام باب المطار
في هذا اليوم الذي ابتدي بالصمت من بزوغ الفجر الي غياب الشمس والصمت يخيم داخلي وفي كل مكان في منزلي وحتي داخل مخيلتي وفي افكاري
كانت اقسي كلمة سمعتها في ذاك اليوم عندما قالها لي والدي
(اشوف وشك بخير)
عندها كاد قلبي يتمزق ودمعت عيناي بغزارة وانا اودعه ثم ارتميت بحضنة وبكيت
مع انها ليست المرة الاولي ولا الثانية ولا حتي الخامسة
ولكن هذه المرة ينتابني شعور بالخوف واحساس غريب بالوحدة وتحمل المسؤلية
وكانت من اقسي الكلمات التي سمعتها في ذاك اليوم ايضا عندما وصاني علي اخوتي وعلي امي وترك في عنقي وعلي عاتقي مسؤلية صعب تحملها
ولم اكد اتحمل تلك اللحظات نعم لحظات الفراق المميتة
وبالفعل علمت ان اصعب احساس في الحياة احساس الفراق
دائما وابدا يمر في ثواني معدودة ولكنها مليئة بالاوجاع والالم
اشتقت اليك كثيرا يا ابي
فراغ كبير خلفته خلفك لا اطيق تحمله
اتمني من الله العلي الكريم ان يحفظ ابي ويحميه من كل اذي ومكروه
ويرده الي سالما من كل اذي
واتمني ان لا افارقه ابدا مرة اخري
واتمني ايضا ان لا اشهد انا وقلبي لحظة مثل تلك اللحظة المميتة
اسف علي غيابي ولكن لظروف خارجة عن ارادتي

77 What Abdot You ?

لحظة من التفكير  

مرسلة بواسطة Abd-Alrahman

اثار زيارتي لاحب مكان بالنسبة ليا
الي بشكي له همومي وبيسمعني
الي بفرح فيه وبكون في قمة السعادة
والي لما بزعل فيه بكون في قمة الحزن
المكان الي فيه اكتر ذكراياتي الجملية والحميمة
المكان الي بجد بجد انا بعشقة جدا جدا
الاسكندرية
بجد المكان دة اكتر مكان بحبه في مصر وكل سنة ليا فيه ذكرايات خاصة وجميلة
وتجارب وفسح وفرح وزعل وحوارات وجوابات
بس السنة دي بجد كانت زيارتي ليه مختلفة
انا لسة راجع من اسكندرية امبارح علي فكرة
بجد المكان دة السنة دي كان مختلف اوي اوي بالنسبة ليا
كان نقطة تغيير بجد للمود الي كنت فيه
مع اني مكنتش مصدق فكرة تغيير الجو دي
مع ان في بعض الحبايب نصحوني بيها كتير اوي عشان اطلع من المود الي كنت فيه
ولكن كنت مستمر في الخنقة الي كنت عاملها لنفسي في الاوضة بتاعتي من بعد الي حصلي
صحيح يا جماعة تقريبا معظم الي دخل مدونتي ورد علي تدوينتي الي فاتت كان بيسالني علي السبب الي مزعلني
وكان مخليني مكتئب من الدنيا كلها
وانا مكنتش قايلة لاني كنت خايف اوي منه لكن دلوقتي خلاص
انا مش خايف
السبب للاسف اني نزلت السنة دي في الكلية ومعايا 4 مواد من 12 مادة
علي العموم مش موضوعنا دلوقتي
لما روحت غيرت جو بجد اسكندرية السنة دي ادتني حاجات كتير مع اني كنت تقريبا هناك لوحدي
ولكن بجد ادتني الفرصة اني اقف مع نفسي وقفة كنت محتاجها اوي
وكمان بجد بعد الوقفة دي ثقتي بنفسي رجعت لي تاني بعد ما كانت للاسف خلاص اوشكت علي الموت كمان الامل جالي تاني مع اني كنت خلاص هحول من الكلية بتاعتي
ولكن دلوقتي انا عزمت علي تحدي نفسي ويا انا يا الكلية دي
بس بجد اتعلمت كتير من الوقعة دي مع اني كنت شايفها مصيبة كبيرة وحاجة كانت هتحطمني بجد
ولكن الحمد لله بفضل الله اولا وثانيا بفضل كل صحابي
حاولت اتعامل مع الموقف دة من زاوية تانية بجد خلتني اجمد واقوي بكتير من الاول
وهنـــــــــــــــــــا وقفت مع نفسي ورتبت اوراقي من جديد
واتعلمت ان كل حاجة وليها نظام
وامنت اوي بالمثل الي قال الي ميموتكش يقويك
وانا النهاردة بجد بعد ما صليت ركعتين شكر لله
بشكر كل المدونين واصحابي وحبايبي الي وقفوا معايا كلهم وشجعوني بكلامهم الجميل
وبشكر حبيبتي وروح قلبي الاسكندرية الي دايما معايا في كل مواقفي الحلوة والوحشة
وبجد الواحد عرف ان مفيش حاجة بتحصل اعتباطا كدة كل حاجة لحكمة يعلمها الله
وانا بجد اتعلمت الدرس كويس اوي وقفلت مكان الياس والاحباط في قلبي
وبشكر ربنا كتير اوي
اسف طولت عليكوا بغيابي بي اسكندرية كانت واخداني منكم
ملحوظة الصور من تصويري

64 What Abdot You ?

عودة .. ولكن محبطة ويائسة جدا  

مرسلة بواسطة Abd-Alrahman


السلام عليكم ورحمة الله وبركاته
بعد انقطاعي فترة كبيرة عن التدوين تقارب الشهرين
وللاسف كان لظروف الامتحانات وظروف تانية خارجة عن ارداتي
وبين قراري البعد واعتزال التدوين
وضغط بعض الاخوة المدونين عليا لحد ما رجعت
رجعت ولكن للاسف المرة دي مش زي كل مرة
كل مرة كنت بارجع مليان بالنشاط وحاسس بفرحة كبيرة
لكن المرة دي مش عارف الاحباط تملك مني بطريقة رهيبة
للاسف لما الواحد بيتعب اوي وبيجي علي نفسة اوي علشان خاطر حاجة معينة
ويستحمل تعب كبير اوي عشان الحاجة دي ويبذل مجهود كبير اوي فيها ويوقف كل حياته عشانها
وفي الاخر يلاقي ان كل المجهود والتعب الي تعبه وكل الي عمله بيضيع قدام عنية في لحظة
مع انه مقصرش الا في حاجات بسيطة
للاسف بيفقد كل حاجة وبيكره كل حاجة
وبيلاقي نفسة مش عايز يبذل اي مجهود تاني ولا عايز يتعب تاني علي الفاضي
وللاسف هوة دة الي حصلي
وانا من النوع الي مبيحبش كلام الشعارات وانت قوي واقوي من كدة ولازم تحاول تاني ومش عارف اية
بحس ان الي بيقولي كدة بيضحك عليا او بياخدني علي قد عقلي
للاسف اول مرة اجرب طعم الفشل في حياتي
و لاول مرة بفشل في حاجة مع اني مقصرتش فيها انا عملت كل الي قدرت عليه
وانا دايما مؤمن بان كل واحد بيتعب ربنا بيديلة علي قد تعبه
بس مش عارف اية الي حصل المرة دي حصل حاجة مش قادر احددها
وللاسف من ساعتها وانا عايش في جو صعب عمري ما دخلته ولا عشت فيه
بل بكرهه حالة نفسية صعبة منعزل منطوي علي نفسي
كل الي حواليا لاحظوا التغيير كله حاول معايا بس للاسف مش عارف
شكلي رايح في نوبة وهطول شوية
وهيا كدة الدنيا لما بتزعل حد بتزعله اوي ولما بتاخد من حد حاجة بتاخد منه اعز حاجة بيحبها وبيمتلكها
وللاسف هيا خدت مني اكتر من كدة
اخدت مني الامل بتاعي كمان وخلتني عاجز عن اني اكمل تاني وكل فترة بتسود الحياة اكتر
اتمني من كل الي يزورني انه يدعيلي
وانا هحاول اني اكتب تاني في الفترة دي ولكن لو اتاخرت تاني ياريت الكل يعذرني

91 What Abdot You ?

شجاعة شاب من شباب مصر  

مرسلة بواسطة Abd-Alrahman

انا النهاردة جايب الفيدو دة معرفش اذا كنتم شوفتواه قبل كدة ولا لاء

الولد دة من اشجع الشباب الي في مصر

وقف قدام الريس واتكلم بكل صراحة وبكل شجاعة وبكل حب لبلده ولمستقبلها وبكل احساس فعلا

ولد بطل بطل

اتكلم وقال ياريس افرج عن مصر ياريس

وقال كمان مصر حزينة يا ريس

ومصر فيها كتييييير وكتير منه بس المشكلة ان كل دة بيندفن وبيموت كلة في سيبل حاجة واحدة

والي هيا الجري ورا لقمة العيش

وفي النهاية برضة مصر هتفضل محكومة بالحديد والنار

لحد ما شباب مصر كلهم يبقوا بالشجاعة الي عند الولد دة

علي العموم علي راي المثل صورة ابلغ من 1000 كلمة اسيبكوا مع الفيديو

وقولوا اية رايكم

احنا لسة عندنا بقايا حرية ولسة في ناس بتحلم ببكرة افضل






56 What Abdot You ?

قصيدة من وحي الصيدلة !!  

مرسلة بواسطة Abd-Alrahman

ازيكم يا جماعة وعاملين اية ؟؟
عارف اني مليش وش اسال عليكم لاني بقالي فترة كبيرة مقصر جامد في حق كل المدونين بس والله غصب عني
لان انتوا عارفين كلية صيدلة وعارفين انطاحنات اعمال السنة والشيتات عاملة ازاي
وانا امبارح لسة خارج من انطحان عقاقير بجد بجد كان حقنة بس الحمد لله عدي وعندي كمان كام يوم انطحان عضوية والدنيا دايكة
علي العموم بس ياريت تدعولي ربنا يسترها معايا وتعدي علي خير ويارب اقدر ارد كل الردود الي جت لي في الفترة الي فاتت دي
وبالمناسبة بقي انا جي النهاردة بصيدة صيدلانية جااامدة جدا جدا
بمناسبة الانطحانات والبهدلة
متاكد انها هتعجبكوا بس عايز رايكوا فيها اية
وياريت تكون بداية جديدة جميلة اصالح بيها كل المدونين الي غبت عنهم الفترة الي فاتت
اسيبكوا مع القصيدة ويارب تعجبكوا
*******************************
Infection ياذا القلب لا تحزن فذاك الحب
Injection فلن تجدي عقاقير ولن تشفيك
Direction فكم من عاقل فطن مضى بالحب
Mention ستنكره وتنساه ولن يبقى له
Section فلا تنظم له شعراً ولا تكتب له
Selection ولا يحزنك من باعك فقد أخطأت
action ولا تبدي له أسفاً ولا تبدي له
exception فإن الحب منزلةٌ لبعض الناس
tension فبعض الناس إن هجروا فلا حزنٌ ولا
connection وبعض الناس إن هجروا يظل ويبقى
reaction فوصل الروح له فعل وما أحلاه
affection بدعوات بقلب دجى لها أثر و
Passion فان لم يبق لي شيئ فلا حب و لا
conversion فلا أسف على دنيا لك وعليك
*************************
اسف طولت عليكوا بس مستني الردود بتاعتكوا وانشاء الله وعد مش هغيب تاني عن التدوين الفترة دي
عبدالرحمن

62 What Abdot You ?

لحظات الحياة  

مرسلة بواسطة Abd-Alrahman


في بداية يوم من ايامه في الحياة

يزيح الغطاء عنه بكسل ليكشف عن جسده الممدد وعن عينان شاحبتان

تجد فيها معني التعب والارهاق بكل معانيه

ينطق كلماته المعهودة بكل كسل وخمول

الحمد لله الذي احيانا واليه النشور
يقوم بعد مشاورة لمدة خمس دقاق
(اقوم .. ولا مقومش .. متقوم يا عم ..لا انا مكسل .. لا هقوم)
وفي الاخر بكل خمول وتعب يتوضاء ويصلي ركتعي الفجر قضاء
يرتدي ثيابة بتعب ويتجه للمراه وعندها يقف وقفة طويلة ويري اشياء لم يرها من قبل واحساس لم يتملكه من قبل
كان يريد ان يصفف شعره ولكن توقف عن كل شيئ وظل يراقب عيناه والصمت يملاء المكان

يمر امام عيناه شريط حياته بكل ما راي فيه من ايام ومن لحظات ايام عصيبة وايام في غاية السهولة لحظات راحة ولحظات تعب
واوقات جميلة واخري تعيسة
يتذكر ايام ان كان انقي واطهر لايحمل في حياته الا النقاء والبرائة
ولا يفكر مطلق في المسؤلية الصعبة والحياة الثقيلة
يتذكر ايام نعومة اظافره وايام وليالي قضاها في احضان ابيه بكل حنان وبكل حب
يتذكر كل ما كان يحمله في الحياة
وكل ما كان يعبا به وكل ما كان يحيط به من اصدقائه ومدرستة وواجبه وجدول الضرب الذي لم يتم حفظه والعلقة التي تنظره من امه
بسبب توسيخ ملابسه
ويتذكر ايام كانت في غاية الصعوبة وفي غاية المرارة ويتذكر لحظات في غاية الرومانسية والجمال
ويدرك عندها ان الحياة دقائق معدودة وكانها ساعة او ساعتين
وكان كل احداثها حدثت بالامس القريب
يقطع صمت المكان وهدوئه صوت صديقة من تحت شرفته المتواضعة
( يلا يا ابني اتاخرنا علي السكشن)
اتخض طبعا خضة كبيرة
ورد عليه بتوتر جاي اهه
وفي هذة الحظة يلملم ذكرايات حياته في اقل من ثانيتين ويقوم بتصفيف شعره
ويتجه نحو يوم شاق مليان متاعب ومحاضرات وسكاشن
ويعود ليحاول اعادة اللحظة الجميلة الي عاش فيها امام المراه والتي احتوت حياته وملات عليه وحدته عليه
ولكن يخفق في كل محاولاته ويذهب لفراشة ليصارع دقات قلبه في محاولات طويلة لايجاد النوم ويغط في سبات عميق وكان شيئا لم يكن

وهكذا الحياه

عبدالرحمن

52 What Abdot You ?

تاج جديد  

مرسلة بواسطة Abd-Alrahman



كل تاج جديد وانت سعيد
يا جماعة التاج دة اتباصالنا من المدونة العزيزة نهي صاحبة مدونة حتته سكر
واكيد بنقول اسفين في التاخير علي الرد عليه بس انا كنت مشغول اوي اوي
انا هجاوب علي التاج دة ومش انا بس نور كمان هتجاوب عليه معايا
وعلي العموم شكرا اوي يا نهي علي التاج الجميل دة ويارب دايما
واكيد انا اول ما هعمل تاج هبعتهولك
لومكنتش مصري بس عربي .. كانت هتبقى إيه نظرتك للمصريين واللي بيحصل في مصر دلوقتي؟
عبد الرحمن : اكيد كنت هبص للعرب ككل علي انهم اتفه مخلوقات علي وجة الارض كله واكيد كنت برضة هكون ناقد ليهم بطريقة غريبة لان الي بيعملوه بصراحة مايعملوش اي حد عاقل
*******************************
نور : بصراحة كنت هبصلهم باحتقار لاننا اصبحنا دلوقتى شعب فى قمة التخلف واللامبالاة مصر كانوا بيقولوا عليها ام الدنيا مصر صاحبة اعرق تاريخ فى العالم مصر ارض الفراعنة مصر اللى ذكرت فى القرآن مصر ومصرو مصر اين مصر من كل هذا الان ؟؟؟؟؟؟؟؟؟بقينا شعب ضايع تافه وشباب مجنون بالموضة والتقليد لا يفقه شئ الا الجيل وبنطلونات اللو ويست والكراش والكورة عشان كده انا هانظرلهم نظرة توبيخ واحتقار يمكن يفقوا ويرجعوا بلدهم زى ما كانت
...........................................................
لوكنت أوروبي أو غير مسلم بردو إيه نظرتك للعرب والمسلمين؟
عبد الرحمن : اكيد زي اي نظرة اوروبي دلوقتي !! عادي يعني
*******************************
نور : اين العرب والمسلمين ؟؟؟؟؟؟؟؟؟؟هنا اسلام بلا امة ترعاه احنا مسلمين بالاسم بس لكن احنا فين من دين الاسلام والله لو كنا مسلمين بجد ما بقى حالنا كده خاااااااااااااالص عشان كده هتكون نظرتى ليهم نظرة الشفقة لاننا كعرب شعوب غبية معانا اللى نقدر نصلح بيه حالنا واحنا كل يوم بنبعد عنه اكتر واكتر و اكتر
........................................
لوقالولك إنت بقيت رئيس جمهورية هتعمل إيه؟
عبدالرحمن : مع ان دة عمره ما هيحصل ولا في الاحلام اكيد هحاول احس بالناس وبكل طوائف الشعب كنت هحاول اقف مع كل الشعب واحط نفسي مكان كل واحد فيه
*******************************
نور : هرفض انى اكون رئيس للجمهورية لان دى مسئولية مش سهلة خالص وانا طبعا حاليا بخبرتى المحدودة فى الحياة مش اهل ليها خالص وانا مش ابقى رئيس جمهورية عشان اشيل ذنوب الناس دى بس هدى المسئولية لانسان يقدر يتحملها بجد ويقدر يصلح حال البلد دى
......................................
لو كان ينفع ترجع طفل تاني وتخليك طفل علطول هترجع؟ وليه؟
عبدالرحمن : هرجع في ثواني
لان احلي ايام بصراحة عشتها كنت وانا طفل بعيد عن المسؤلية الغبية
ومش هرجع بس انا هقولهم ياريت متخلونيش اكبر تاني
*******************************
نور : بصراحة اتمنى ارجع طفلة تانى بجد كانت اجمل ايام حياتى الواحد مش شايل هم حاجة غير بس ازاى العب واتفسح واتبسط لكن دلوقتى مش بيجيلى نوم من كتر ما بفكر فى الحاجات اللى ورايا والدنيا اللى بحس انها كلها ضدى " اتمنى ان اعود طفلة اكبر همى كيف اتمتع بلعبى"
...............................................................
لو إنت طبيب وعندك مريض ميؤوس من حالته .. أيهما تفضل .. إنك تصارحه بالوضع وتقوله كل شيء بأمر الله في الاخر ولا تغرس فيه الامل لغاية لما يموت؟
عبدالرحمن : مش عارف الصراحة اية الي ممكن اعملة في الموقف دة بس اكيد اكيد هحاول اخفف عنه واحسسه بالامل
*******************************
نور : بصراحة افضل انى اغرس فيه الامل ويعيش اللى فضله فى سعادة فتبقى الايام اللى فضلاله فى الحياة كانها عمر بحاله احسن ما اقوله ويجيله اكتئاب ويموت من احساسه ان هيموت بس
..........................................................
لوسمح لك برؤية الرسول عليه الصلاة والسلام وإنك تقوله كلمة واحدة بس أو جملة واحدة بس هتكون إيه؟
عبد الرحمن : اكيد في كلام كتيييييييييييييييير جدا ملوش حصر بس في كلمة واحدة الي هقولها دلوقتي
اســــــــــــــــــــــــــــــــــــــف جدا يارسول الله
*******************************
نور : هقوله كان نفسى تكون معانا دلوقتى مكنش حال امة الاسلام بقى كده وهقوله محتجالك اوى
.......................................................
لوخطبت واحدة أو اتخطبتي لواحد وأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون تصرفك إيه؟
عبد الرحمن : اكيد لو في حب بين الطرفين المشكلة دي مش هتعمل اي حاجة انا عن نفسي مدام بخبها خلاص هكمل واكيد هلاقي حل للمشكلة دي طبيا فيما بعد
*******************************
نور : اكيد طبعا لو بحبه بجد ولا هيفرق معايا الموضوع ده خالص لان ده هيبقى نصيبى ونصيبه ودى حاجة مش بايدينا وكفاية حبه ليا ده يخلينى اسعد انسانة فى الدنيا
........................................................
لوطلعت القمر هتكتب إيه عليه؟
عبدالرحمن : اولا انا مبحبش حكاية الكتابة علي الحيطان والفلوس والموضوع دة ولكن اذاكان ولا بد هكتب بحبك يا.............وكمان هكتب تحت اهداء للقمر وهقول فيه من غيرك صعب اليل يكون بجماله من غيرك يصعب علي العاشق حاله
*******************************
نور : هكتب للى بحبه بحبك وبمووووووووووووووت فيك يا حياتى وادى القمر شاهد على حبى ليك
....................................................
لوكنا في عصر ازدهار الأندلس كنت تتخيل نفسك إزاي؟
عبدالرحمن : الصراحة مش عارف بس اكيد كنت هكون لابس عمه ولابس البنطلون المنفوخ بتاع علاء الدين والجزمة الملوية من قدام دي ههههههههه اكيد شكلي كان هيكون يضحك موووت
*******************************
نور : كنت هتخيل نفسى حد مشهور فى مجال الطب او الصيدلة لانى بحب المجال ده اوى فلو فى تعليم صح اعتقد انى ممكن احقق فيه حاجة حسب الحد دة
....................................................
لو انت مررت التاج ده لحد وما جاوبش عليه أعمل فيه إيه؟
عبدالرحمن :
هوة وحظة بقي الي هيطلع له ساعتها يرضي بيه
*******************************
نور : لو حد قريب منى اوى وانا بحبه ومش جاوب مش هزعل منه بس هحس ان حبه ليا مش اد حبى ليه لانه مش اهتم بحاجة انا اللى بعتهاله اما لو حد عادى يعنى فمش هزعل بس ممكن اخد موقف بس اكيد هلتمسله فى الاول كذا عذر
......................................................
لو هتسافر في أي مكان في الدنيا تعيش فيه هتروح فين ؟
عبدالرحمن : مش عارف بس اكيد هسافر مكان مفيش فيه حد خالص ويكون فيه طبيعة جميلة والحياة فيه بدائية جدا وهعيش هناك لوحدي
*******************************
نور : اروح باريس او كندا اهو الواحد يعيشله يومين بقى وكمان هلاقى شغل كويس ويمكن اقدر احقق برة اللى مش عرفت احققه هنا
.......................................................
لو مررت التاج تمرره لمين ؟؟
عبدالرحمن : لفيرس
وريهام
وجيلان
احمد الصباغ
*******************************
نور لـ:
ريهام
انين الحزن
قبلة الحياة
oceaneyes
...................................................

21 What Abdot You ?

العملة المصرية ..  

مرسلة بواسطة Abd-Alrahman


النهاردة يا جماعة انا هحكي موقف حصل النهاردة بس ضحكني اوي قولت لازم احطة علي البلوج انا يا جماعة النهاردة كنت في المكتبة بصور ورق وبعدين كان ليا باقي اخدت الباقي الي كان من ضمنه الجنية الي حطيت صورته والي اكيد شوفتوها انا بجد اول ما شوفت الروشتة الي كريمان كاتباها لهند علي الجنية بجد ضحكت جامد جدا بجد اول مرة اعرف ان السفن اب بيتشرب علشان البرد ولا دة علاج من وحي الطبيعة ولا اية مش عارف ولا يمكن عند الاسيوطيين البرد بيتعالج بالسفن اب
وقبلها قبل ما اروح اسيوط برضة وقع في ايدي النص جنية الي فوق الجنية دة برضة ضحكت عليه بس مش زي الجنية طبعا
ومع اني ضحكت لان الي حصل يضحك بس كل دة وان كنا بنضحك عليه الا انها مأساه
الجنية المصري بقى ملطشة !
بالذمة ده منظر عملة وطنية؟!
ايه اللي بيخلي الشعب المصري يتعامل بالأسلوب ده مع الفلوس؟ أصبح من الطبيعي جدا انك تتعامل بفلوس لها لون وطعم وريحة كمان
، فلوس تعرف ان اللي اتعامل بيها قبلك كان ميكانيكي او طعمجي او نقاش..
مش بس كده.. المصريين بيتعاملوا مع الفلوس مش كأنها عملة للبيع والشرا ..لا .. وانما كانها وسيلة للدعاية والإعلان!
(راجع الصورة بالأعلى) جنيه مصري غلبان يصبح مكتوب عليه انه يكون طول عمره للذكرى الهباب وايام العذاب والنوم ع التراب ا
و واحد تاني يجيله مزاجه يكتب ع الفلوس اسم مولوده الجديد .. انا جيت نورت البيت 1/1/2007 ..
او واحد تالت يكتب كلمات للذكرى لحبيبته ..
او واحد رابع بيعد فلوس مثلا وعشان مينساش يكتب اخر رقم وصله على اول جنيه يقابله،
او واحد بيعد رزم ويكتب على كل رزمه اسم صاحبها الخ.. والجنيه المسكين غلبان وبيستحمل والحقيقة ان ده جزء من ثقافة المصري سليل الفراعنة اللي كانوا بيكتبوا ع الحيطان،
فمش غريب انه هو كمان يكتب على حيطان المترو وابواب الحمامات وكراسي الاتوبيس.. الجنيه يعني هو اللي جدع وعلى رأي عمنا بيرم لما قال:
هتجن يا ريت يا اخونا مرحتش لندن والا باريس دي بلاد تمدين ونضافة وذوق ولطافة وحاجة تغيظ عمرك مسكت ورقة دولار او يورو .. بالذات اليورو ..
ايه النضافة دي يا جدعان ..
العملة ماسكة نفسها والوانها هتنطق حتى الورق ابن حلال مبيطبقش كده زي الجنيه
.. عملة اليورو معمولة من اوراق بنكنوت مخصوصة تشبه البلاستيك عشان متتوسخش والا تتقطع
..
بينما سهل وطبيعي جدا انك تتعامل بجنيه مهربد وملزوق بالوان زاهية ! شيكارتون بني او شريط لحام ازرق واحمر !! مش غريبة ان السواح يرفضوا يتعاملوا بالجنيه بتاعنة ويقرفوا يمسكوه... صاحبنا اللي عامل الخمسين قرش اللي فوق دي والي كاتبة روشتة علي الجنية الي فوق دة
(وهي بجد على فكرة)
شاف انه ارخصله يعمل ختم ويطبع اسمه على كل العملات اللي بيتعامل بيها كنوع من الدعاية غير المكلفة وسريعة الانتشار
كمان.. مش غريبة بقى لو لقينا في يوم من الايام الواحد بيكتب ايميله على الجنيه بالطريقة نفسها
عباس عباس اندرسكور فيفتين @ طرف الحاج ياهو دوت كوم
ويبقي انت اكيد في مصر ام الدنيا
(ايقون بيشد في شعره)

33 What Abdot You ?

۞ أمــاكــن رائـ ع ــه ولاكنـها مؤلمــــه ۞  

مرسلة بواسطة Abd-Alrahman

۞ أماكـــــــــــن تمر بها ۞
فتشم بها رائحه ماضيــــــــــك
فكأنها تعيد الزمن اليك بطقوسه بسويعاته بذكرياته
بأناس قاسموك يوما كل شيء حتى انفاسك
۞ وأماكـــــــــــن تمر بها ۞
فترى بها ملامح طفولتك
تلمح بها رفاقك الذين كبروا
تنقب عن آثار براءتك عليها
تتبع خطوات شقاوتك على ارضها
وتبتسم بمرارةوتردد -- ليتنا لم نكبر
۞ وأماكـــــــــــن تمر بها ۞
فتفتح لك دفاترك المغلقه
تستعرض امامك صفحاتك القديمه
تعيد اليك ما القيت به في خزانه الذاكرة معتمدا
وتمنيت مع زحمه الايام ان تنساه
وتعلقت بطوق النسيان في بحرالحياه كالغريق ولم تنسه
۞ وأماكـــــــــــن تمر بها ۞
فتكشف لك جرحك المستور
ويعتري أمامك جسد الذكرى المغطى برداء النسيــــــــــان
وتأتي اليك بارواح
لوحت لها يوما مودعاولوحت لك باكيـــــــــــــه
۞ وأماكـــــــــــن تمر بها ۞
فتطفىء صفحاتك البيضـــــــــــاء
التي تفننت في زخرفتها وتنقيتها
وتستعرض امامك صفحات سوداء
تفننت في الهروب منها..
وحاولت جاهدا مسحها من ذاكرة تاريخك
متناسيا ان ذاكرة الاماكن لاتنسى ابدا
۞ وأماكـــــــــــن تمر بها ۞
فتناديك طرقاتها
فيخيل إليك إنك تسمع أصوات
أصحابها الذين كانوا
تلتفت حولك وخلفك مرتعبا
فلا تلمح سوى بقايا تنبض بروح الامس
وكأنهم ماكانوا
۞ وأماكـــــــــــن تمر بها ۞
فتتمنى أن تختفـــــي من فوق
الأرض وان يتم مسح تضاريســـــهاتماما
فعليها فقدت الكثير من نفسك
وعليها نحرت الكثير من قيمك
وعليها كانت البشاعه عنوان لـ إنسانيتك
وعليها كنت انت ليس انت
۞ وأماكـــــــــــن تمر بها ۞
فتغمض عينيك أمامها ألما
فهذه الأماكـــــــــــــــــن كانت يوما تعني لك الكثير
أحتوت احلامك في مهدها كالام
وربتت على حزن أيامك كالوطن
وسترت مشاعرك
ومنحتك الفرح والأمان بلاحـــــــدود
۞ وأماكـــــــــــن تمر بها ۞
فتشعر بالغصه تتسلل الى اعماق
كوتشعر بالمرارة تستقر في فمك
فهنا احببت يوما
وهنا كان لقاؤك الاول يوما
وهنا كان انكسارك الاول يوما
۞ وأماكـــــــــــن تمر بها ۞
فينحرك المرور بها نحرا
فهنا كنت أجمــــــــــل
هنا كنت أصغــــــــــر
هنا كنت أنقـــــــــى
هنا كنت أصــــــــدق
وهنا كنت أطهـــــــر
فتعود منها محملا بكل الأشيـــــــــــــاء
الإ نفســــــــــــــك

41 What Abdot You ?

قصة حب  

مرسلة بواسطة Abd-Alrahman

ازيكم يا جماعة اخباركم ايه
النهاردة بمناسبة الفالنتين "معلش متأخرة شويتين" بس حبيت اقدملكم قصة من اروع قصص الحب
الحب بكل معانى الولاء والاخلاص والتضحية
يلا اسيبكم مع القصة

شايفين البنت والولد دول؟؟؟ حلوين مش كده؟؟؟؟؟
دول ادريانا وجورج ..ولد وبنت امريكيين نشأت بينهم قصة من اجمل قصص الحب والرومانسية
..عاشوا مع بعض اجمل ايام حياتهم فى انتظار يوم زفافهم على احر من الجمر
لكـــــــــــن
فى الوقت ده بدأت امريكا حربها ضد العراق
وطبعا سافر جورج مع الجيش الامريكى
مواطن مسالم ملهوش اى ذنب غير ان حظ الوحش انه كان فى الجيش فى الوقت ده
وهناك فى العـــــــــراق
حصله حادث مروع..وقعت عليه قنابل من طيارة امريكية ..وطبعا اتحرق ..وجسمه ادمر خالص ..واليكم الصور ..بجد صعبة موت ..ياريت اللى قلبه ضعيف ميكملش الموضوع



شوفتوا شكله ؟؟؟؟صعب اوى مش كده
مبقاش ليه ملامح اصلا

ادى اخرت الحرب الامريكية
مش تدمير للعراق بس
لا تدمير شعبها نفسه
عشان كده فى مواطنين امريكيين كتير بيكرهوا امريكا وجورج بوش


المهم بقى انت او انتى لو مكان ادريانا هتتصرف زى ما هى اتصرفت
يعنى ممكن تضحى لو حبيبك او حبيبتك حصلها كده
يا ترى هتقدر تكمل معاه بقيت حياتك وهو بالشكل ده؟؟؟؟؟
اتمنى اعرف رايكم ايه





41 What Abdot You ?

كان حلم وتحقق !!  

مرسلة بواسطة Abd-Alrahman


كنت جاي تعبان ومنهك تماما بعد عناء يوم من ايام الشتاء الشديد

وطلعت السرير وبعد عناء في محاولات كل يوم في جذب اطراف النوم

بين صوت الهواء الي بيصفر في الشباك وبين صوت قطرات المياه في حنفية المطبخ الي بتحايل علي امي تجيب السباك يصلحها من ايام الثانوي

!!وحلمت الحلم الغريب الي اول مرة احلمه

حلمت ان المنبه رن وزي العادة طفيته وبعدها بشوية
لاقيت ماما ((قوم ياعبده علشان تفطر )) اممممممم طيب
وقمت فطرت وبعد كدة ببص بطرف عيني في اخر الاوضة لاقيت الشنط بتاعتي متحضرة سالت ماما قالت انت هتسافر النهاردة
طبعا نفسي اتسدت طلعت في الروف بتاع الاوضة بتاعتي بصيت علي الشارع بتاعنا وهوة زي ما هوة مبيغرهوش الزمة ولاقيت العيال الصغيرين بيلعبوا كورة تمام بالظبط زي ماكنت بلعب في نفس المكان في الابتدائي
ذرفت من عيني دمعة تبعها سيل من الدموع ولاقيت ماما من ورايا (( اية هتفضل واقف كتير ؟؟))اممممممم
اكيد بعد ما ممسحت دموعي في موقف مش بالسهل انه يعدي عليا وانا بفتكر احلي ايام طفولة قضيتها في حياتي
قولت لها يا امي
انا هاخد دش علي السريع وهلبس دلوقتي
وبعدها كانت الدنيا بعد كل دقيقة بتعدي كانت بتبعد عني احساس غريب كل ما اجي اسافر اللبلد الي بعتبرها المنفي بتاعي
ولكن الحقيقة صعبة المواجهه ومرة المذاق بعدها ب10 دقائق لاقيت المنهبه بيرن في الحقيقة وصحيت ولكن المرة دي مطفيتوش وفعلا لاقيت الاوضة زي ما هيا وكل الي حصل في الحلم حصل في الحقيقة
وانا حاليا بكتب البوست قبل السفر بحاجة بسيطة
وعايز اقولكوا يا جماعة اني بجد المرة دي خايف بطريقة مرعبة
من كل حاجة بعد ما شفت امتحانات الترم الاول والبهدلة بتاعتها
كمان بعد ما بقيت في البيت لوحدي بعد تخلي صاحبي عني بعد ما اتفقنا اننا منروحش المدينة الجامعية باعني وسابني وراح علشان تعبان من لسوعة الطبيخ
محتاج كل دعاء من ادعيتكم الجميلة في الصلاه وبجد انا هستعين بربنا علي الي انا فيه
وانا باذن الله واثق جدا جدا اني ربنا هيعوضني كتير
برضة احب اسجل اسفي الشديد لاني هغيب عن المدونة الايام الي جاية
يمكن تواجدي هيكون قليل شوية واكيد كلكم عارفين السبب
علي العموم البركة في الاخت نور العزيزة
وربنا معانا
اشوف وشكم علي خير وفي امان الله
عبدالرحمن

77 What Abdot You ?

انك صيدلى  

مرسلة بواسطة Abd-Alrahman



هاى يا جماعة
ده اول بوست ليا فى المدونة
بما ان المدونة اسمها الصيدلى المطحون
وبما انى والحمد لله مطحونة موت فى الكلية دى
فحبيت اقدملكم قصيدة انك صيدلى
دى قصيدة كاتبها واحد زميلى فى الكلية
عن العذاب والبهدلة اللى احنا فيها فى الكلية دى
وعن مستقبلنا ان شاء الله
يلا اسيبكم مع القصيدة
ويارب تعجبكم


انك صيدلى الى كل الصيادلة الغلابة ... ارى في حالكم عجبا عجابا
تمرمطنا وولى العز عنا ... سذاجتنا السبب او قل خيابة
تدحدر حالنا يا ابني كثيرا ... واصبح وضع مهنتنا هبابا
و يكفي لبهدلتنا ان لدينا ... نقابة بفقرنا مغرم صبابة
فغض الطرف انك صيدلي ... فلا طبّا بلغت و لا ادابا
ولا تتفشخرن ولو ليوم ... فاني اراك اغلب م الغلابة
تظل لخمس اعوام حمارا ... و تفني فيها مالك و الشبابا
عليك من المنهاج حجم فيل ... وراسك ديه في حجم الذبابة
امتحان لست تدري ... اهل هذا سؤال ام اجابة
فتجذب شعر راسك يا صغيري ... و تفقد وقتها يا ابني الصوابا
فلا تقلق اذا اتجننت يوما ... فلا لوم عليك ولا عتابا
و تسحب للمعامل كل يوم ... لحب , انت لا تخشى الغيابا
و كم من معمل احرقت فيه ... يديك و شعر راسك و الثيابا
و تدفع دم قلبك في كتاب ... حرام ان نسميه الكتابات
ودعك الدراسة في نفور ... فتلقاك المصحة في رحابة
يا عيني كم رايتك مكفهرا ... عبوس الوجه مليان اكتئابا
فلا علما في راسك تدخره ... ولا مالا فمن حولك ديابة
ارى السباك افضل منك حالا ... و ما يشتهي يصبح مجابا
ولا يحميك ان تحمل شهادة ... فلن تفتح لك الشهادات بابا
فبياع ببالطو د انت طبعا ... دا حتى البالطو قد فقد المهابة
يقف ف الاجزخانة كل شخص ... يجيد بس القراءة و الكتابة
و دع شهرين بعدها هتلاقيه ... طبيبا مالي مركزه مهابا
فذو الدبلوم يؤخذ اما انت ... فتخرج م الملاعب للاصابة
ولو تحلم بان تاكل كبابا ... فسوف تسف من جوعك ترابا
ولو تحلم بان تاخذ قروضا ... هتتجرجر يا سيدي الى النيابة
فدنيانا اسنت لك سيوفا ... و اعملت الاسنة و الحرابا
فبادر و اشتر "توك توك" بسرعة ... تاهل و اغتني و افتح حسابا
او اذهب فاشتغل كوافير حريمي ... او اعمل يابني رئيس عصابة
دا افضل م الجلوس جوار امك .... بتعزف لحن خيبتك ع الربابة
فبعد تخرجك من اين تاتي ... مصاريفك ؟ فلن يعطيك بابا
و اني ناصح فعساه قولي ... يعيد لعقلك الفاضي الصوابا
فاخوف ما اخاف عليك صار ... خرابا و اضطرابا و اغترابا



NOUR

22 What Abdot You ?

خبر جديد  

مرسلة بواسطة Abd-Alrahman


يا جماعة انا خلاص هاخد برأي الاغلبية الي نورني باصواتهم الجميله
وكلهم قالوا اخلي الاسم الاساسي وانا هخليه انشاء الله
واحب اقولكم علي الخبر الجديد
ان صديقتي العزيزة نور حسني
صيدلة القاهرة اشتركت معايا في المدونة هنا
وباذن الله هتلاقوا ليها موضيع كتير قريب
(ايقونة غمزة)
يلا بقي يا جماعة عايز ترحيب من نار هههههههههههههههههه
نور برضة زينا مطحونة في صيدلة القاهرة وربنا معاها ومعانا
علي العموم اعرفوا معلوماتها من البروفايل مستني ردودكم الجميل
وخلاص اسم المدونة زي ما هوة
واحب كمان اهديكم الصورة الجديدة دي
اقولكم من النهاردة الطحن بدا خلاص
يعني ربنا يسترها






عبد الرحمن

18 What Abdot You ?

استطلاع راي في تغيير اسم المدونة  

مرسلة بواسطة Abd-Alrahman

يا جماعة انا النهاردة كان لازم اغير اسم المدونة

والسبب اني لما كنت بعمل المدونة دي كنت في ظروف مش كويسة وكنت بمر بايام صعبة علشان كدة عملت اسم المدونة

الصيدلي المطحون

ولكني دلوقتي شايف الاسم دة بقي مش لائق شوية للمدونة ودة الدافع الي خلاني اغير الاسم بتاع المدونة

ولكني للاسف مينفعش اغير اللنك يبقي اللنك هيفضل زي ما هوة

ولكن علي العموم حصل خير

بس يا جماعة اتمني اعرف اية رايكوا في الموضوع دة واية رايكوا في الاسم القديم والاسم الجديد

الاسم الجديد

يوميات فرماوي


اية رايكوا في الاسم دة وياريت الي عندة اي اي اسم شايف انه ينفع للمدونة يكتب هولي بسرعة

وانا هعتبر ان البوست دة استطلاع راي

ولما يخلص هغير اسم المدونة بالاسم الي هيكون اكتر شعبية

يلا يا جماعة وروني همتكوا بقي

23 What Abdot You ?

رسالــــــــــــــــة  

مرسلة بواسطة Abd-Alrahman


في رسالة وصلتني من الاخ العزيز
محمد صلاح

وبجد الرسالة عجبتني وانا استاذنت منه اني احطها في البلوج كبوست جميل

اسيبكوا مع الرسالة واتمني ان اري تعليقاتكم الجميلة

لماذا يصعب علينا قول الحقيقة بينما لا يوجد اسهل من قول الباطل ؟؟؟

لماذا نشعر بالنعاس ونحن نصلي ولكننا نستيقظ فجأة ونشعر بالنشاط فور انتهائنا من الصلاة ؟؟؟

لماذا يصعب علينا الكلام عن الله تعالى وأمور الدين . .. ويسهل علينا الكلام عن باقي الأشياء ؟؟

لماذا نحس بالملل عند قراءة مقال ديني . ونشعر بالفضول عند قراءة مقال عن أي شيء آخر؟؟؟

لماذا نمسح الرسائل الإلكترونية ( الإيميلات ) التي تتحدث عن الأمورالدينية ... ونقوم بإعادة إرسال الرسائل العادية ؟؟؟

لماذا نشعر أن المساجد أصبحت مهجورة وأن المراقص والملاهي أصبحت عامرة ؟؟؟

هل تستسلم ؟؟؟

فكر بالأمر هل سترسل هذه الرسالة لأصدقائك ؟؟؟

أم أنك ستتجاهلها وتعاملها كأي رسالة دينية أخرى ؟؟

ضع شيئاً واحداً في بالك فقط هو أن الله يراقبك دعنا نرى إن كان باستطاعة الشيطان أن يتصدى لشيء كهذا

عندما تصلك هذه الرسالة

قم بالدعاء للشخص الذي أرسلها لك

لن يكلفك الدعاء شيئاً بل سيأتيك بالثواب الجزيل

ولا تنس أن تعيد إرسال هذه الرسالة لجميع أصدقائك ليقوموا بالدعاء لك

دعنا نستمر بالدعاء لبعضنا البعض

( سبحان الله وبحمده سبحان الله العظيم ) ' اللهـــــــــــم )

اللهم يا رحمن يا رحيم يا سميع يا عليم يا غفور يا كريم

إني أسألك بعدد من سجد لك في حرمك المقدس من يوم خلقت الدنيا إلى يوم القيامة أن تهدي قارئ الرسالة ومرسلها

وتطيل عمره على العمل الصالح وان تحفظ أسرته وأحبته وان تبارك عمله

وتسعد قلبه وأن تفرج كربه وتيسر أمره وأن تغفر ذنبه

وتطهر نفسه وان تبارك سائر أيامه وتوفقه لما تحبه وترضاه اللهم آمين ......أرسلها لمن تحب

20 What Abdot You ?

بشريات من الواقع  

مرسلة بواسطة Abd-Alrahman

السلام عليكم ورحمة الله وبركاته اخواني واخواتي في الله
احب اولا اهنيكم بالاجازة وياريت تستمتعوا بيها علي قد ما تقدروا
النهاردة يا جماعة انا وانا بابحر بين صفحات الانترنت
لاقيت صور لفتت انتباهي بطريقة جميلة جدا وعجبتني جدا جدا
بشري بين ظلمات الفتن المحلكة التي غطت علي سماء المسلمين
بشري من كل مكان في العالم
المسلمون وهم يحرصون علي اداء الصلاه المفروضة في اوقاتها
اللهم ثبتهم واهدي عاصيهم يا رب
وكما قال رسول الله صلوات الله وسلامه عليه
لاتزال طائفة من امتي قائمة علي الحق
وكما قال الله تعالي في محكم تنزيله العزيز
وَلِلَّهِ الْعِزَّةُ وَلِرَسُولِهِ وَلِلْمُؤْمِنِينَ وَلَكِنَّ الْمُنَافِقِينَ لَا يَعْلَمُونَ
اترككم مع الصور واظنها لا تحتاج تعليق
وكما يقال الصور ابلغ من الكلام












ياريت اسمع ارائكم الجميلة


20 What Abdot You ?

اول تاج في تاريخ المدونة  

مرسلة بواسطة Abd-Alrahman


تاج الصباغ
-------*-------*-------


اولا احب اشكر حبيبي خالوا احمد
علي التاج الجميل الي مررهولي دي
ويا جماعة دة اول تاج يتمرر لي في تاريخ تدويني
يلا يا خالوا اديك حجزت اول تاج
-------*-------*-------


هل توافق على حزف خانة الديانة من البطاقة الشخصية ؟


طبعا لا


ما رأيك فى المثليين ؟ هل هى حرية شخصية ؟ هل توافق على الإعتراف بالمثليين ؟ هل لديك أصدقاء من المثليين ؟


اكيد طبعا ليا اصدقاء مثليين جدا واوافق عليهم بشدة ولكن مش في معظم الاوقات


هل تعتقد بوجود إضطهاد للمسيحين فى مصر ؟
لا


من هو الشخص الذى تختارة لرئاسة مصر ؟


احمد عمر هاشم


أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟ هل توافق على مشاركة كل من : الإخوان المسلمين - الأقباط فى الحكم ؟


اكيد هضم كل الي اشوف انهم صالحين للمنصب الي هيكونوا فيه
اكيد طبعا اوافق علي مشاركة الاخوان والاقباط كمان


فى رأيك الشخصى .. ما هى أفضل مدونة على بلوجر قمت بزيارتها ؟


بيدي *** لن انتظر
مدونة الدكتور حماس بصراحة الراجل دة بيعجبني فكرة بطريقة عجيبة جدا


للذكور فقط : أيهما تفضل كزوجة .. إمراءه عاملة ، أم ربة منزل ؟


ربة منزل طبعا


للإناث فقط : هل توافقين على الزواج من رجل مطلق ؟
......................

تزوجت وأنجبت ولدين وبنتين .. أى الأسماء تحب أن تسمى ؟


والله عمري ما فكرت في الحكاية دي خالص
وانا سايبها لوقتها لان القرار دة مش هيكون بتاعي لوحدي


هل تعتقد أن توريث الحكم فى مصر . . سيتم فعلا أم لا ؟


دة اساسي دي اخر حاجة مبارك هيعملها قبل ما ي....... صاحب العمر الطويل


فى رأيك الشخصى : ماهو أفضل إنجاز لحكومة مبارك ؟ وما هو أسوأ عمل قامت به ؟


الصراحة مش شايف لها اي انجازات لحد دلوقتي
والاعمال السودة ملهاش حصر واخرها غلاء الاسعار

14 What Abdot You ?

فرحة العودة  

مرسلة بواسطة Abd-Alrahman

بصراحة انا فرحان جدا جدا النهاردة لاني خلصت امتحانات يا بشر
وروحت بلدي ودلوقتي بكتب البوست دة وانا في بيتي وسط اخواتي وعليتي
بجد احساس جميل افتقدته لمدة شهر كان شهر قاسي جدا وكان برد جدا وكان كلة انطحانات
والحمد لله ربنا ستر ورجعت البيت
بس يا خسارة اكيد هيجي يوم وهرجع للبلد الظالم اهلها تاني
بس اكيد برضة هيجي يوم بعدة وهرجع بلدي تاني واهي كدة الحياه
يوم ليك ويوم عليك ويوم تفرح ويوم تزعل
ومفيش حاجة بتفضل علي حالها او بتفضل علي وتيرة واحدة ودي نعمة كبيرة ربنا انعم بيها علينا
بس بجد انا مبسوط جدا اني هقضي اكبر وقت مع اصحابي البلوجاتية
وعلي البلوج بتاعي وبتاعهم وهتصفح في الانترنت براحتي لمدة 15 يوم من النهاردة وانا معاكوا
واكيد هنستغل الوقت دة في حاجات كتير مفيدة وهنعمل حاجات كتير تفيد الاسلام والمسلمين

25 What Abdot You ?

انصروا اخوانكم المسلمين  

مرسلة بواسطة Abd-Alrahman

السلام عليكم ورحمة الله وبركاته
دي صور من وقفة المدونين احتجاج وتضامن مع اهل غزة نصرهم الله وكان في عونهم
اد اية كان الاحساس دة جميل جدا جدا اد اية الاحساس دة كان فية معاني كتيرة كان الواجب علي كل مسلم يحسها ويكون فيها
اسيبكوا مع الصور والدعوة واتمني ان تنصروا اخوانكم بالمقاطعه وبالدعاء


نذ 14 /6 /2007 اعلن حكم الاعدام في اكثر من 1500 فلسطيني من مختلف الاعمار وبالفعل تم تنفيذ الحكم في 29 منهم والباقي ينتظرواليك صور الموتى مع وقف التنفيذ
اللهم انصرهم يا الله
...اليس لهولاء حق علينا
؟
اتمني من كل مسلم ان ينصر اخوانه المسلمين في غزة بكل ما يملك من الدعاء
والمقاطعة والتبرع والمساعدات المادية والبدنية
وجزالكم الله كل خير

4 What Abdot You ?
Newer Posts Older Posts