انك صيدلى  

مرسلة بواسطة Abd-Alrahman



هاى يا جماعة
ده اول بوست ليا فى المدونة
بما ان المدونة اسمها الصيدلى المطحون
وبما انى والحمد لله مطحونة موت فى الكلية دى
فحبيت اقدملكم قصيدة انك صيدلى
دى قصيدة كاتبها واحد زميلى فى الكلية
عن العذاب والبهدلة اللى احنا فيها فى الكلية دى
وعن مستقبلنا ان شاء الله
يلا اسيبكم مع القصيدة
ويارب تعجبكم


انك صيدلى الى كل الصيادلة الغلابة ... ارى في حالكم عجبا عجابا
تمرمطنا وولى العز عنا ... سذاجتنا السبب او قل خيابة
تدحدر حالنا يا ابني كثيرا ... واصبح وضع مهنتنا هبابا
و يكفي لبهدلتنا ان لدينا ... نقابة بفقرنا مغرم صبابة
فغض الطرف انك صيدلي ... فلا طبّا بلغت و لا ادابا
ولا تتفشخرن ولو ليوم ... فاني اراك اغلب م الغلابة
تظل لخمس اعوام حمارا ... و تفني فيها مالك و الشبابا
عليك من المنهاج حجم فيل ... وراسك ديه في حجم الذبابة
امتحان لست تدري ... اهل هذا سؤال ام اجابة
فتجذب شعر راسك يا صغيري ... و تفقد وقتها يا ابني الصوابا
فلا تقلق اذا اتجننت يوما ... فلا لوم عليك ولا عتابا
و تسحب للمعامل كل يوم ... لحب , انت لا تخشى الغيابا
و كم من معمل احرقت فيه ... يديك و شعر راسك و الثيابا
و تدفع دم قلبك في كتاب ... حرام ان نسميه الكتابات
ودعك الدراسة في نفور ... فتلقاك المصحة في رحابة
يا عيني كم رايتك مكفهرا ... عبوس الوجه مليان اكتئابا
فلا علما في راسك تدخره ... ولا مالا فمن حولك ديابة
ارى السباك افضل منك حالا ... و ما يشتهي يصبح مجابا
ولا يحميك ان تحمل شهادة ... فلن تفتح لك الشهادات بابا
فبياع ببالطو د انت طبعا ... دا حتى البالطو قد فقد المهابة
يقف ف الاجزخانة كل شخص ... يجيد بس القراءة و الكتابة
و دع شهرين بعدها هتلاقيه ... طبيبا مالي مركزه مهابا
فذو الدبلوم يؤخذ اما انت ... فتخرج م الملاعب للاصابة
ولو تحلم بان تاكل كبابا ... فسوف تسف من جوعك ترابا
ولو تحلم بان تاخذ قروضا ... هتتجرجر يا سيدي الى النيابة
فدنيانا اسنت لك سيوفا ... و اعملت الاسنة و الحرابا
فبادر و اشتر "توك توك" بسرعة ... تاهل و اغتني و افتح حسابا
او اذهب فاشتغل كوافير حريمي ... او اعمل يابني رئيس عصابة
دا افضل م الجلوس جوار امك .... بتعزف لحن خيبتك ع الربابة
فبعد تخرجك من اين تاتي ... مصاريفك ؟ فلن يعطيك بابا
و اني ناصح فعساه قولي ... يعيد لعقلك الفاضي الصوابا
فاخوف ما اخاف عليك صار ... خرابا و اضطرابا و اغترابا



NOUR

This entry was posted on 3:53 PM . You can leave a response and follow any responses to this entry through the Subscribe to: Post Comments (Atom) .

22 What Abdot You ?

دكتورة نور
مبروك عليكى أول بوست
ومبروك عليا أول تعليق
بالتوفيق إن شاء الله

Anonymous  

السلام عليكم
بداية رائعة
ومعاناه لا تنتهي
بس بكرا لما نترح الدراسه منحس باننا نفسنا نرجع لايام المدرسة والكلية والبهدله عشان البهدله احيانا بتكون غذاء الروح
:D

بداية رقيقه كصاحبتها

دمت بود

روري

بصراحه القصيده حلوووه بس معلش انا مستغربه من حاجه
صيدله ومش عارفين ان اللي يدخل الكليه ده يحول

كبروا الخط شويه عشان اعرف اشوف
:)

اممممممممممم
افتكر في موتمر الصيدله من سنتين كان شباب مهيصين قووووي وعملين يغنوا بحجات جميله زي ...

صيدلاني وبحب الكميا..... والدح ده جابلي انميا
بصراحه عالفيتو بغير وابيع واشتر عقاقير
اورجنك ... اورجنك ... اورجنك

:)

وافتكر اني في امتحان الاورجنك اللي فاتت كنت قاعده ولسان حالي بيقول

دع الكميا تفعل ماتشاء .... وطب نفسا اذا حكم الغباء
ولا تجزع لحادثه الليالي... فان العام بعد العام داء
فذاكر كيف شئت ولا تبالي ...فكل الدح في الكميا هباء

:) هباء هباء يعني

اتمني اني مش طولت

نور
صديقتي العزيزة
بجد بجد
بداية غير متوقعه
واكيد البلوج نور ببوستك الاولاني
وانشاء الله دايما في استمرار علي المستوي الجميل دة

بجد القصيدة لمست كتير اوي اوي من الي احنا بنشوفه في الكلية
بس برضة لسة في حاجات متكتبتش

فكرة مميزة وطريقة ساحرة في الكتابة

عزيزتي لقد تلاعبتي بالكلمات وسطرتيها بحرفيه فلك مني جزيل الشكر والامتنان


يا جماعة شايفين انا برضة مبصاحبش الا الناس التمام
بجد يا نور بوست جميل اوي وانا فخور بجد انك معايا في المدونة


عبدالرحمن

ميرسى يا فزلوكة على تعليقك الجميل
ويشرفنى انك تكونى اول تعليق على البوست بتاعى
واتمنى ان البوست يكون عجبك

وعليكم السلام يا رورى
ميرسى اوى يا جميل على تعليقك الرائع ده
وفعلا عندك حق رغم انى متبهدلة ومطحونة فى الكلية الا انى بموووووووووت فيها ولما بغيب يوم عنها بحس ان فى حاجة جميلة ناقصانى
يلا اخدت عالبهدلة بقى
تانى مرة احب اشكرك اوى على كلماتك الرقيقة دى

NOUR

انا مبسوطة كتير ان القصيدة عجبتك يا نسرين
ومعلش يا قمر ان شاء الله المرة الجاية هكبر الخط
انتى تأمرى وانا انفذ يا جميل
جميلة اوى كلمات التهييس اللى كاتبتيها
ادى اخرت الكلية دى
الكيميا خلاص خليتنا هنجنا خالص
وفعلا كله هباء هباء
حتى دكتور الاورجانيك عندنا مش مقتنع اصلا بالاورجانيك دى بيقولنا دى كلها تخيلات محدش شاف حاجة
"فاذا كان رب البيت بالدف ضاربا ....."
لا حول ولا قوة الا بالله
ميرسى يا جميل على تعليقك المميز
NOUR

عبد الرحمن
ازيك
ايه يا عبد الرحمن الكلام الجامد ده
بجد ميرسى اوى على كلماتك الرقيقة دى
وفعلا انا سعيدة وفخورة جدا انى يكون ليا صديق زيك
ويكفينى فخرا انى اشترك معاك فى مدونتك الرائعة دى
ابقى قولى اخبار الكلية معاك ايه
اوك يا عبد الرحمن
سلام يا اعز الاصدقاء

NOUR

مبرووووك يا نور
اول بوست لكى
:)

ومستنين كل جديد يا دوك
:)

وربنا يوفقك

ومعلش دايما باجى فى الاخر كدا
بس الموصلات انتى عارفة :D

نور

أول مرور لي ولن يكون الأخير بإذن الله

القصيدة حلو أوي رغم كمية التشاؤم وبالبؤس اللي فيها

وأنا كنت كلية نظري بس صدقيني كلنا في الهوا سوا

وكلنا اشترا نفس الربابة فلا كان الصيدلي أسعد حظا و لا طال خريج أداب بيده السحاب

بس الفرق فعلا أن خريج صيدلة بتكون طلعت عينه قبل ما يتخرج وصرف دم قلبه زي ماقلتي

تحياتي ليك وللمدونة المتميزة

الله يبارك فيكى يا نهى
وميرسى اوى يا جميل على تعليقك الجميل
ومتقلقيش انا عارفة ان المواصلات بقت زحمة موت اليومين دول
ويشرفنى جدا انى البوست بتاعى يكون عجبك والاقى تعليقك عليه يا جميل

NOUR

ميرسى اوى يا هوبا على مرورك وتعليقك الرائع
ويسعدنى ان مرورك ده مش يكون الاخير
وصحيح القصيدة فيها تشاؤم شويتين
بس هى لمجرد الفكاهة يعنى
يعنى رغم كل اللى مكتوب فى القصيدة الا ان بردو الكلية فيها حاجات كتير حلوة
بس بردو عندك حق كلنا فى الهوا سوا
ولا بتاع طب بيشتغل ولا بتاع اداب
بس الحمد لله على كل حال
تحياتى ليكى يا قمر وتعليقك المميز
NOUR

يانهار اسود على الضحك اللى انا ضحكته
الناس اللى نايمه جنبى صحيت
والله كلا جميل بشكل مش معقول
اللى كتب الكلام ده ياجماعه عاش معاناه حقيقيه
مدونة رائعه
وفقكم الله

يا ساتر يارب

يا منجي من المهالك يا رب

فعلا والله صدق المثل اللي بيقول

اللي يشوف دراسه غيره تهون عليه دراسته
قلبي معاكم والله واحتمال تكون محفظتي كمان معاكم عشان ضايعه من اول امبارح

بجد روعه مين صاحب القصيدة المكتئب ده

يا ساتر انا بجد بفكر اعملكم صندوك معونة ورقم حساب للتبرعات

بجد روعه روعه

جايه بالظبط على حال كل الطلبة والخريجين

تحياتي واحترامي ومعوناتي

ههههههههههههههههه
نعليقك متميز جدا يا عمار
الحمد لله ان القصيدة عجبتك وخليتك تضحك
اهو بنعبر عن الكبت اللى جوانا فى شعر احسن ما يعلى ضغطنا من الكلية دى
ميرسى اوى يا عمار على مرورك وتعليقك الرائع واتمنى ان زيارتك للمدونة تتكرر ودايما البوستات تعجبك
NOUR

ميرسى اوى يا عنقاء على تعليقك الرائع وميرسى اوى اوى على صندوق التبرعات اللى هتعملهولنا
والحمد لله ان القصيدة عجبتك وعبرت عن جزء من الواقع المرير اللى بيعيشوه الطلبة والخريجين اليومين دول
اه علىفكرة انا لقيت محفظة اول امبارح لونها فحلقى لو بتعتك هستناكى يا قمر تيجى تاخديها
اتمنى دايما انك تشرفينى بزيارتك للمدونة NOUR

Anonymous  

السلام عليكم ورحمة الله وبركاتة

عجبا لامر ابن ادم صدق فيه قول الصادق صلي الله عليه وسلم -- لو ان لابن ادم جبل من ذهب لتمني ان يكون له ثاني ولا يملا عين ابن ادم الا التراب -- تدعين يا اخناه انكي من طائفة الغلابه وبعد ايام قليلة او كثيرة ستتحولين الي واحدة من مصاصي دماء الشعب تتاجرون بسلعه من اهم ما يحتاجة الانسان الا وهي الدواء تعلمون كم حاجة الامسان الية ومع ذالك تضيفون ارباح خيالية تحصلون عليها انتم وتشاركون شركات الدواء في عمليات نصب مقننه قانونا علي المواطن الغلبان كلكم الا من رحم ربي يتاجرفي المخدرات الا من عصمة ايمان بربه ويقين بيوم الحساب
كلكم الا من رحم ربي لاتاخده شفقة ولا رحمة بالمرضي كل ما يشغل بالكم هو المكاسب والمكاسب يا شباب تدعين انكم من المطحونين صبرا قليل فبعد ايام ستصبحين من اصحاب الملايين وبعد ايام قليلة ترضين بواقع انتقديه من قبل وتلبسبين ثوب النفاق

هذه ليست سبه ولكن واقع مجتمعي ثابت في كل طوائف هذة البلاد
وحقا لا يملاء عين ابن ادم الا التراب

وعليكم السلام
ابوفرقان

بسم الله الرحمن الرحيم "ادعو الى سبيل ربك بالحكمة والموعظة الحسنة "
اخى ابى فرقان انا ليس لى الحق انا اتعرض على كلامك ورأيك فهذه حرية شخصية ولكن مادمت تتمسك بدين الله ورسوله الكريم عليه افضل الصلاة والسلام فلتنتقى الالفاظ والاسلوب الذى تتحدث به
فلقد اعتبرتنى مصاصة لدماء البشر
اانت تعرفنى ؟؟؟
اانت تعرف شخصيتى وسماتى ؟؟؟
فباى حق القيت على هذه التهمة وحقا انا لا ادرى من اين اتيت بفكرة ان الصيادلة يكسبون الملايين
ربما تكون على صواب ولكنى لا ادرى شيئا عن ذلك الا كونى طالبة فى كلية الصيدلة ليس بحثا عن المال ولكنى حبا فى هذه الدراسة
ولا اعلم مصيرى فيما بعد هل حقا ساكون من اصحاب الملايين ام ساظل مطحونة هكذا
شكرا اخى الكريم على تعليقك وارجو منك ان تتحلى بخلق نبيك الكريم فى تعامله مع الناس واعطاء النصيحة
جزاك الله خيرا
NOUR

بجد تحححححفة....جت على الجرح فعلا

انا اول مره ازركم
واضح انكم اصدقاء وبنكم لغه لها طعم مختلف سعيدا جدا انى اشركم
بس ليه تعليق صغير على لون المدونه لماذا تشهدونها سوداء؟....

Anonymous  

السلام عليكم أنا محمد عبدالجواد اللى كتبت انك صيدلى وانا سعيد جدا من رد الفعل عليهاواحب اشكر نور وباهيها واهديكم اخر اعمالى عن الصيادلة


شُعـاع البداية
"يوم فى حياة طالب صيدلة "

كتبها / محمد عبدالجواد فضل- الفرقة الخامسة

حياتنا بتمشى
وأهى الدنيا دايرة
وشلة زمايلى
على النهج سايرة
بنحضر محاضرة
نفوِّت محاضرة
ويوم لما نحضر
بتبقى مغامرة
فى دكتور يشدَّك
فترمي له ودنك
ودكتور بيقرا
نطنش كلامه
ونقعد نهلّث
نهجّص
نهيّس
وآه لو هزارنا
فلت من لجامه
بنسرق دقايق
ننعنش قلوبنا
ونغسل همومنا
ده أصل الزمان ده
مزاجه المعاندة
و كله حقايق
وأرقام تضايق
ودستوره مادّة
معاك تبقى عايق
وسايق
ورايق
تيجى تروح معادك
تبُص فى أجندة
برستيج ومظهر
على "بروباجندا"
خلاصة الكلام ده
بننسى الكلام ده
ونقعد نهزر
ننكِّت ونرغى
ونسأل بحُرقة
على جزء ملغى
نصُب اهتمامنا
ومعظم كلامنا
على واد زميلنا
مركّز
محضّر
مسيطر
منظّر
بيتمنى يطلع
فى يوم من الأوائل
دماغنا تلعلع
نقوم له نلسوع
دهره بهزارنا
ونعمل عمايل
وواد تانى قاعد
فالنتينو جامد
يمزمز فى "كانزه"
وكل اللى عايزه
يصاحب بُنيَّة
لزوم المسائل
وفوق فى المعامل
يا دادة يا عامل
ودكتور
وبالطو
وشلة زمايل
بتلبس وتجهَز
تروح للمُحَضِّر
يقوم يستغلك
وفيه تفش غلك
وتقلِب وتنجز
وتنقل
يا تتقل
وتعجن وتخبز
بذمّة وهمّة
وبعدين تلملم
تسلّم
تعلّم
فى "شيت" الكتاب
وده ورقة صفرا
بسبعين جنيه
لزوم الغياب
نخلُّص فننزل
ونقعد فى حوشنا
-ومين راح يحوشنا-
على سور جنينة
ودِكّة متينة
نجلجل
نصهلل
تقوم أزعرينا
وأساتذة تلاقينا
بنفتى و لينا
فى كل مناقشة
آرائنا الثمينة
فى أهلى وزمالك
وتوريث مُبارَك
وهيفاء ونانسى
وطبّ المسالك
وقبل ما نمشى
نروح كعب داير
على مكتباتنا
نشوف البشاير
خبر ليكو عاجل
ورق لسّة نازل
مِلَخَّص
مِخَلَّص
جايب من الآخر
نصوّر
وندفع
نودّع
ونرجع
لبيتنا بورقنا
ونمسح عرقنا
وفينا اللى شاطر
أول ما يوصل
هيبدأ يذاكر
وفينا المكبر
ودى نسبة أكبر
لأن بصراحة
شربنا فى زمننا
علوم التناحة
وبطلنا نحلم
وبطلنا نعلم
وخدنا لدماغنا
أجازة وراحة
ودبلانة روحنا
وغرقان طموحنا
وقهر الزمان ده
فى بكرة معشش
وصوته مغلوِش
على صوتنا إحنا
بنكتم جروحنا
ونرضى بضريحنا
ولقمة تعيِّش
وضحكة يتيمة
على وش كرمش
يا تبقى مدَرْوِش
يا تبقى انتهازى
وضميرك مجازى
هتقدر ساعتها
تحوِّش,تكوِّش
يا روحنا يا موجة
يا بنت اللذينة
يا تايهة فى بحرك
يا خابطة فى سفينة
يا عايشة بطيبتك
فى دنيا لعينة
بتقتل شبابنا
ومش راحمة شيبنا
وَصيّة علينا
بإيد مش أمينة
يا روحنا يا موجة
بنستنى هوجة
تخبَّط, تلخبط
تهز السفينة
يا روحنا كفاية
مذلّة ووصاية
وإمتى لكرامتك
نشوف أى آية ؟!
نفكر فى فكرة
ونحلم ببكرة
ونرسم بإيدنا
شعاع البداية ...

رااااااااااااااااااااائع جدا شكرا ليكي