بطاقة تعارف  

مرسلة بواسطة Abd-Alrahman




اولا يا جماعة احب اعرفكوا بنفسي
انا اسمي عبد الرحمن محمد

18 سنة

عملت زي ما قالوا لي في الثانوية اجتهد علشان مستقبلك ومش عارف اية الكلمتين الي اكيد كلنا سمعناهم وزهقنا منهم

المهم عملت الي قالوالي عليه

واجتهدت وتعبت جدا والحمد لله جبت مجموع% 97.

ولكن للاسف مكتب التنسيق وداني صيدلة اسيوط

علي فرق درجه

ومن ساعتها وانا نفسي اولع في نفسي

لية بيعملوا فينا كدة

بجد حسيت بالظلم الشديد ومن ساعتها وانا بقرا القران علشان استمتع بقرائة

الاية الي بتقول

(( ربنا اخرجنا من هذه القرية الظالم اهلها ))

ومن ساعتها وصحابي لقبوني بميت مع ايقاف التنفيذ

واديني عايش

وبدور علي بريق من الامل

وياريت كل الي في صيدلة ومتبهدل زيي كدة يدخل معانا علشان اكيد هنقدر نساعد بعض حتي ولو بالكلمة

وربنا معانا

This entry was posted on 4:54 AM . You can leave a response and follow any responses to this entry through the Subscribe to: Post Comments (Atom) .

24 What Abdot You ?

الاول ايه الاحباط ده كله؟
لازم تبقى واخد بالك من الايه" عسى ان تكرهوا شيء و هو خير لكم"

ثانيا انا ليا اخ برضه دخل هندسة اسيوط على فرق درجة بس صدقنى سنة اسيوط دى فرقت معاه كتير فى حياته عموما

ثالثا احنا صيدلة طنطا و اى صيدلة هتكون مطحون فيها فتقبل الامر الواقع

رابعا اهلا بيك فى عالم مهروسين صيدله و و ياريت تزورنا على البلوج بتاعنا كتير و هتلاقى ان الحياة حلوةوتغير لقب ميت مع ايقاف التنفيذ دى

خامسا تصبح على خير بأه احنا الفجر دلوقتى

مبروك البلوج
و ربنا يوفقك
متهيألى الصيدلات كلها زى بعض
كلها مصايب
واكيد اعدتك هناك دى هتأثر على شخصيتك

:)

مبروك البلوج مرة تانية

و ياريت تشير البتاعة بتاع الحروف اللى فى الرد دى

مبروك البلوج :)

وخطوة كويسة عشان تخرج من حالة اليائس اللى انت فيها دى

الحياة مش بتمشى على وتيرة واحدة يا دوك
جايز ربنا سبحانة وتعالى بيعلمك من المحنة - اللى انت - شايف نفسك فيها دى

وبعدين " وعسى ان تكرهوا شيئاً وهو خيرا لكم "

اهم حاجة خلى عندك قوة من الداخل ..وقابل اى مشكلة تقبلك فى حياتك عموماً وفى الكلية خصوصا بابتسامة:)
وخلى عندك امل فى اثبات نفسك مهما كانت الظروف
وانت قدها يا دوك عبد الرحمن
:)

معاك : نهى .. صيدلة المنصورة :)

زربنا يوفقك وفى انتظار بوستك الاول

الف مبروك على البلوج

اما بالنسبه لموضوع البوست
معلش اصبر شويه

سبحان الله ساعات بيكتب للانسان حاجه
عكس ما كان عايز خالص

وعسى ان تكرهوا شيئا هو خير لكم

وان شاء الله ترجع بلدك بعد السنه دى

مبروك البلوج وان شاء الله تعدي السنة دي وتحول وتبقى تمام ولعل تكون فعلا نقطة تحول ولا حاجة

انا بس بقول اسيوط مش وحشة يعني ، وصيدلة اسيوط دي روعة .. حد يقدر يتكلم!!!

كان معكم على الهواء مباشرة

نور .. صيدلة اسيوط .. مطحونة سنة ثالثة .. ولا اراكم الله مكروها في عزيز لديكم
!!

!شوفت.. خليك متفائل بقى

يا دكتور عايزة اوضح لك حاجة في الاول
صيدلة اسيوط تعتبر من اقوى كليات الصيدلة بعد عين شمس وقبل القاهرة من الناحية التجهيزية والكم العلمي

النظام القديم اللي انا فيه دلوقتي صعب جدا جدا وبجد عايز مجهود كبير يتبذل علشان تجيب تقدير علشان بناخد المادة كلها على بعضها في ترم واحد

لكن النظام الجديد اللي حضرتك تعتبر تاني دفعة فيه .. اسهل بكتير واخف وماشي زي نظام الصيدلات في القاهرة وعين شمس وكدا .. يعني هما 6 مواد في الترم مثلا بس ممتدة للترم التاني واخف طبعا في الكم واحسن في تحصيل الدرجات

حتى مثلا الشفوي عندنا من 75 .. في نظامكم انتوا بعد ما اتغيرت الايحة بقى الشفوي من 20 .. يعني تمام اوي

ومميزات كتيرة والله ، اهم حاجة ان انت ما تحاولش تدي نفسك شعور سلبي بأن الكلية مش حلوة او غيره لأن الشعور دا هو اللي بيبني رؤيتك بعد كدا

فاحنا عايزينه شعور ايجابي علشان تكون رؤية متميزة .. بجد رغم العذاب والبهدلة بتاعة الدكاترة وشحططة الامتحانات وانا لسة خارجة من امتحان فارماكولوجي .. كان علقة بصراحة

إلا ان انا بحب الكلية جدا جدا .. حب الكلية علشان تحبك .. بجد لو اديت نفسك الشعور الايجابي دا هيفرق معاك اوي

المهم يعني علشان ما اكونش رخمة .. ذاكر واعمل اللي عليك وربنا هيكرمك ان شاء الله .. وأي حاجة احنا في الخدمة بجد

وربنا معاك ويوفقك إن شاء الله

مبروك البلوج و معلش السجن للجدعااان

قصدى صيدلة واقع و اتفرض عليا و ربنا معاك ان شاء الله

مبروك
انت عارف انك جايب درجة زيادة عن سراج منير المغني الجديد هو واخد 96% و انت واخد 97% في المية
جدع ولاهي ماشاء الله
طب متدخل فن او تمثيل ؟

السلام عليكم

اولا اهلا بك في عالم المدونين
خطوة حلوة وجميلة
للكتابة وللتنفيس

بص بقى يا سيدي
بالنسبة للكلية
فده قدر الله وماشاء فعل
97% ما شاء الله مجموع كبير

ويوم ما القي اللوم مش حلقيه عليا الحمد لله
بل على النظام
اهم حاجة في الموضوع ده انى عملت اي عليا
بس ربنا عاوز كده
تانى حاجة حاول تجيب تقدير وتقدر تحول

ثالثا بقى
حد يطول يبقى دكتور
فيه غيرك اكيد كان نفسهم في الكلية دي
وبالتالي قدر الله وماشاء فعل

لما تفتح صيدلتك ابقى قولي وانا ابقى زبونة مستديمة

ولا تزعل نفسك ابدا

سلاماتي يا دكتور :)

اهلا بيكي sa'7so'7te علي البلوج بتاعي المتواضع وشكرا ليكي بجد انك اهتميتي بالموضوع
واكيد انشاء الله انا من الزوار الدائمين علي المدونة بتاعتكم

اهلا بيك break وانا بجد بجد يا حماعة فرحان جدا جدا
ان بقي ليا صحاب جداد بدل ماكنت لوحدي

اهلا بيكي noha
وشكرا علي مرورك الجميل
وانا اكيد ربنا هيقويني وهكون قدها بس
الصعوبة الي في الاول الي لازم اي حد في الحامعة يمر بيها شكرا ليكي علي اهتمامك

اهلا بيكي loza
علي فكرة عايز اقولك علي حاجة انا ازهر مش تربية وتعليم يعني مفيش تحويل فيا لازهر ودة الي مدايقني

يعني 5 سنين في اسيوط
ربنا يستر علينا بقي

شكرا علي مرورك الكريم

يا نور انا زي ماقولت انا ازهر علي فكرة انا روحت الجامعة بتاعتك في اسيوط جميلة جدا جدا علي عكس جامعتنا في الازهر خالص خالص
المهم

انا زي ماقولت مفيش ليا تحويل يا جماعة
وانا مش عارف انتي متافئلة لية وعلي اية اصلا
شكرا علي مرورك

ماسي يا Ma -3lina
اتريق براحتك ناسي لكل ظالم نهاية
ههههههههههههه
شكرا علي مرورك

بيتهيالي يا بنوتة ان الحكاية مش مستاهلة ظرافة وهزار
غلي العموم شكرا علي مرورك الجميل
وبعدين هعتبر كلامك جد يا حماعة انا ازهر ومفيش غندنا فن ولا تمثيل

شكرا ليكي mesh2dra علي كلامك الجامد دة وربنا يخليكي
وانا مش بلقي اللوم علي نفسي ولا حاجة
ولكن انا بسال لية بس مش اكتر
وبجد شكرا ليكي واتمني ان نكون اصدقاء

أهلا بالصيدلة و اللى بيدخلوها

قصدى أهلا و سهلا و مرحبا بالصيادلة

شكلى كدة وقعت فى فخ من الفارماكولوجى و العقاقير و النباتات السامة

لا يا جماعة احنا قرايب برضه

أنا ف طب بشرى

و بعدين أؤمن بالآية


(( لا تحسبوه شرا لكم بل هو خير لكم ))

و بعدين دى تقديرات ربنا سبحانه و تعالى


و صيدلة على ما أعتقد لذيدة و 5 سنين تاك أواى

مش أحسن ما تخش فى الغريق زينا ؟؟

يا عم احمد ربنا يا عم

و بعدين محدش واخد منها حاجة




د.حمــــاس

DR.HAMAS

تشرفت انا ومدونتي المتواضعة
بزيارنك وتعليقك الكريم
وربنا معاك ومعانا
ويسهلها لكل الي زينا

كيف تحسب الدرجات في الثانوية عندكم في مصر؟ لأنني لاحظت الكثير من المدونين يذكرون أن مجموعهم 97% أو 98% أو حتى 99% ... انتوا بتجيبوا المجاميع دي ازاي؟ في الدنيا كلها من يحصل على مجموع أكبر من
95% يعتبر شديد العبقرية ويعطى منحة في أي دولة يريد الدراسة فيها وفي أي كلية
أم أن حساب المجموع عندكم يختلف؟

Anonymous  

السلام عليكم .. انا اول مره ارد علي مدونه لاني اساسا معنديش مدونه بس انا داخله متطفله عليكم انا هقول رأيي المتواضع في المدونه بجد والله جميله وكفايه ان عبدالرحمن الي عملها..... وبقولك ياسيدي ربنا يوفقك وينجك ووالله انا كان نفسي اروح كليه بعيده بس الظروف... وبعدين اسيوط حلوه وممكن تكون هي خير ليك احسن من كليه تانيه قريبه.... وكفايه كده عشان مطولش ... وعلي فكره انا بنت عم عبد الرحمن الكبيره ناهد

ياسمين حميد

طريقة حساب المجموع تختلف كتير
وبعدين دماغ المصري مش زي اي دماغ ولا ايى يا سمسم

نورتيني

عبدالرحمن

ناهد

نورتيني يا قمر

وشكرا علي كلامك الي زي القمر

Anonymous  

السلام عليكم ييييننننصصصصاب بقى دى أخرتها ربنا يكرم وأنت عارف أزاى وفى ألاخربردة مش عجبك صحيح أن ألانسان لظلوم كفار